Дар ноҳияи Балҷувон, бахусус  дар мавзеи Сари Хосор баҳри рушди соҳаи сайёҳӣ ва беҳтар намудани  инфрасохтор аҳамияти ҷиддӣ дода мешавад. Дар ин мавзеъ, ки дар ҳама фасли сол табиати зебо дорад,  барои сайёҳон шароити зарурӣ муҳайё гардида истодааст. Дар фасли зимистон ҷангалзор ва кӯҳҳои Сари Хосор ҷомаи сафеди махмалин мегиранд ва дар ин ҷо баъзан то якуним  метр барф меборад. Масъулини бахши сайёҳии ноҳия  мақсад доранд, ки дар ин мавзеъ лижаронию дигар намуди варзиши зимистонаро ба роҳ монанд, менависад хабарнигори минтақавии АМИТ «Ховар» Сулаймон ХОЛОВ.  

Мавзеъҳои зебоманзари «Пушти миёна», «Патру», «Ҳакимӣ», «Обиборик», «Тахти Сулаймон», кӯлҳои «Темурдара», «Париён», «Ҷувозак» ва истироҳатгоҳи муолиҷавии Қаратоғ барои рушди сайёҳӣ дар ноҳияи Шаҳринав нақши муассир бозида, барои сайру саёҳат маконҳои беҳтаринанд. Аз ин рӯ онҳо таваҷҷуҳи садҳо нафар сайёҳони ватанию хориҷиро ба худ ҷалб намудаанд.

Ноҳияи Шаҳринав  дорои боду ҳавои мусоид, меваҳои шаҳдбор, манзараҳои нотакрори табиат, кӯҳҳои осмонбӯс, пиряхҳо, обҳои ширини шифобахш, кӯлҳо, чашмаҳои мусаффо, гиёҳҳои шифобахш, ҳайвоноту наботот, як олами нотакрор ва макони беҳтарини сайру саёҳат мебошад. Аз ин рӯ, дар он сайёҳии экологӣ, кӯҳнавардӣ, зиёратӣ, таърихию фарҳангӣ ва шикору моҳидорӣ рушд ёфта, ҳамасола ба маконҳои зебоманзари ноҳия сайёҳони ватанию хориҷӣ ташриф меоранд.