Бо мақсади муаррифии зарфиятҳои сайёҳии мамлакат ва омода намудани иншооти қабулу хизматрасонӣ ба сайёҳон бо риояи ҳатмии қоидаҳои беҳдоштӣ гурӯҳи кории Кумитаи рушди сайёҳӣ ва чанде аз корбарони шабакаҳои иҷтимоии интернетӣ аз Ҷамоати деҳоти Сағирдашти ноҳияи Дарвоз ва дигар мавзеъҳои сайёҳии он дидан намуданд.

Табиати биҳиштосои Сағирдашти Дарвоз ба барқароркунии саломатӣ ва сайёҳии экологӣ хеле мусоид буда, дар ин мавзеъ ба роҳ мондани сайёҳии асотирӣ ва табиати зинда, агросайёҳӣ, велотур, мототур, аспсаворӣ, човандозӣ, муолиҷавӣ ва табобатӣ, сайёҳии кӯҳию варзишӣ, лижатозии кӯҳӣ, экологӣ, барқароркунии саломатӣ ва шикор мувофиқ мебошад. Сағирдашт аз деҳаҳои Инкӯҳ, Камчак, Кулумбаи Боло, Лухч, Оҳангарон, Рубот, Садика, Сайдон, Сайёд, Сафедорон, Чухкак, Шохорон, Қалъаи Ҳусайн, Лангаро, Пастироғ, Пуштироғ, Чорсу ва Марғак иборат аст, ки ҳар кадоме ҷолибияти хос доранд. Меваҳои шаҳдбори ноҳия таваҷҷуҳи меҳмонону сайёҳонро ба худ ҷалб кардааст.

Бахшида ба эълон гардидани солҳои 2019 — 2021 Солҳои рушди деҳот, сайёҳӣ ва ҳунарҳои мардумӣ, аз ҷониби ширкати сайёҳии Скай Тур-и Тоҷикистон (Sky Tour Tajikistan) ва ширкати «Рахш Таксӣ» дар ноҳияи Айнӣ минтақаи нави сайёҳӣ таҳти унвони «Camping Village» мавриди баҳрабардорӣ қарор дода шуд. Тавре ба АМИТ «Ховар» аз Кумитаи рушди сайёҳии назди Ҳукумати Ҷумҳурии Тоҷикистон хабар доданд, минтақаи нави сайёҳӣ дар соҳили дарёи Саратоғ, воқеъ дар кӯҳҳои баланди Фон ва мавзеи Искандаркӯли ноҳияи Айнӣ ҷойгир буда, мақсад аз он рушди экотуризм дар Тоҷикистон мебошад.