Тоҷикистон таҷрибаи Қирғизистонро дар самти низоми электронии навбати воситаҳои нақлиёт омӯхт

19–20 августи соли 2026 ҳайати Хадамоти гумруки назди Ҳукумати Ҷумҳурии Тоҷикистон бо мақсади омӯзиши таҷрибаи Ҷумҳурии Қирғизистон дар самти татбиқи низоми электронии идоракунии навбати воситаҳои нақлиёти боркаш ба ин кишвар сафари корӣ анҷом дод.

Дар доираи сафар бо муовини Раиси Хадамоти давлатии гумруки Ҷумҳурии Қирғизистон Элнура Мамбетжунушева ва кормандони мақомоти гумруки ин кишвар вохӯрии корӣ баргузор гардид.

Зимни вохӯрӣ масъалаҳои татбиқ ва истифодаи низоми электронии навбат, ташкили фаъолияти он дар гузаргоҳҳои сарҳадӣ, инфрасохтори техникӣ ва имконияти ҷорӣ намудани чунин низом дар Тоҷикистон баррасӣ шуданд.

Ҳайати Тоҷикистон аз фаъолияти низоми электронии навбат дар гузаргоҳи наздисарҳадии «Қизил-Кия автодорожный» шинос шуда, раванди пешакӣ ба навбат гузоштани воситаҳои нақлиёт, бақайдгирӣ, ташкили минтақаи интизорӣ ва даъвати воситаҳои нақлиёт ба гузаргоҳи сарҳадиро омӯхт.

Гуфта шуд, ки низоми электронии идоракунии навбат дар Ҷумҳурии Қирғизистон аз соли 2024 амал намуда, ба коҳиш додани ҷамъшавии воситаҳои нақлиёти боркаш, кам намудани вақти интизорӣ ва беҳтар намудани идоракунии ҷараёни нақлиёт мусоидат мекунад.

Ҳамзамон, ҷонибҳо масъалаҳои рушди ҳамкории иттилоотӣ ва мубодилаи маълумоти пешакии гумрукиро оид ба молҳо ва воситаҳои нақлиёти тавассути сарҳади давлатӣ интиқолшаванда баррасӣ намуданд.

Дар анҷоми вохӯрӣ ҷонибҳо омодагии худро барои идомаи ҳамкорӣ ва табодули таҷриба дар самти рақамикунонии расмиёти гумрукӣ, татбиқи низоми электронии навбат ва мубодилаи маълумоти пешакии гумрукӣ таъкид карданд.

Маркази матбуоти Хадамоти гумруки назди Ҳукумати Ҷумҳурии Тоҷикистон