Аз ҷониби Бунёди адами паҳншавӣ ва халъи силоҳ (НПРФ) ва Дафтари амнияти байналмилалӣ ва назорати содироти Котиботи давлатии Иёлоти Муттаҳидаи Амрико, дар доираи Барномаи назорати содирот ва амният, ба Хадамоти гумруки назди Ҳукумати Ҷумҳурии Тоҷикистон 10 адад таҷҳизоти дастии сканкунии рентгении Nighthawk–BTX тақдим карда шуд.
Бо мақсади истифодаи самараноки ин таҷҳизот, дар заминаи Донишкадаи такмили ихтисоси Хадамоти гумрук дар ду марҳила (23–24 ва 25–26 июни соли 2025) курси омӯзишӣ таҳти унвони “Тартиби самаранок истифода бурдани таҷҳизоти дастии сканкунии рентгении Nighthawk–BTX” баргузор гардид.
Машғулиятҳоро коршиносони Барномаи назорати содирот ва амнияти Сафорати Иёлоти Муттаҳида дар Тоҷикистон гузарониданд. Дар ин омӯзишҳо 20 нафар кормандони масъули дастгоҳи марказӣ ва шуъбаҳои минтақавии Хадамоти гумрук иштирок карда, сатҳи донишу малакаи амалиёти худро такмил доданд.
Истифодаи чунин таҷҳизоти муосир самаранокии назорати гумрукиро боло бурда, имконият медиҳад, ки ҳолатҳои интиқоли ғайриқонунии молу воситаҳо аз сарҳад пешгирӣ ва дарёфт карда шаванд.
Маркази матбуоти Хадамоти гумруки назди Ҳукумати Ҷумҳурии Тоҷикистон
