Хадамоти гумруки назди Ҳукумати Ҷумҳурии Тоҷикистон
қабули довталабонро барои соли таҳсили 2018 - 2019 дар Академияи гумруки Россия эълон менамояд.
Дар асоси Созишномаи бисёрҷонибаи байниидоравии давлатҳои Иттиҳоди Давлатҳои Мустақил (ИДМ) дар бораи ҳамкорӣ дар самти тайёр намудан ва такмили ихтисоси кормандони гумрук аз 23 ноябри соли 1994, бо мақсади таъмин намудани мақомот бо кадрҳои баландихтисос ва пуррагардонии ҷойҳои корӣ бо мутахассисони варзида, аз ҳисоби шаҳрвандон - хатмкунандагони муассисаҳои таҳсилоти умумии миёнаи Ҷумҳурии Тоҷикистон барои таҳсил ба Академияи гумрукии Россия фиристонида мешаванд.
Дар солҳои таҳсили 2018 - 2019 ба Академияи гумруки Россия (Москва ш. Любертси) ва филиалҳояш дар шаҳри Санкт - Петербург, инчунин, шаҳри Ростови лаби Дон аз рӯйи ихтисосҳои «Фаъолияти гумрук» (мутахассис), «Ҳуқуқшиносӣ» (бакалавр) ва «Иқтисодиёт» (бакалавр) довталабон қабул карда мешаванд. Ҳуҷҷатҳо ва аризаҳои довталабон аз рӯзи эълон то 2 июни соли 2018 қабул карда мешавад.
Бояд қайд намуд, ки супоридани имтиҳонҳо аз ду марҳила иборат мебошанд. Дар марҳилаи якум (ш. Душанбе) довталабон диктант (бо забони русӣ) ва санҷиш (тест) месупоранд. Дар марҳилаи дуюм (ш. Москва) довталабон аз фанҳои таърихи Россия, математика, забони русӣ, забони англисӣ ва ҷомеашиносӣ (обществознание) санҷиш месупоранд.
Ба диққати довталабон ва волидайни онҳо расонида мешавад, ки шартҳои зарурӣ барои иштирок дар озмун ин донистани фанҳои математика, забони русӣ, англисӣ ва тайёрии хуби ҷисмонӣ мебошад.
Оид ба шарту шароити таҳсил дар Академияи гумруки Россия ва филиалҳои он Шумо метавонед дар суроғаи rta.customs.ru маълумоти муфассал пайдо намоед.
Суроға: шаҳри Душанбе кӯчаи Бухоро - 50/1, бинои Дастгоҳи марказии Хадамоти гумруки назди Ҳукумати Ҷумҳурии Тоҷикистон. Телефонҳо барои маълумоти иловагӣ: 223-12-16 ва 221-16-92
(иловагӣ 202, 253).
Маркази матбуоти Хадамоти гумруки назди Ҳукумати Ҷумҳурии Тоҷикистон