Print

ЭЪЛОН 2021 - 2022

Аз Муаллиф Қисмат: Эълонҳо Hits: 456

Хадамоти гумруки назди Ҳукумати Ҷумҳурии Тоҷикистон қабули ҳуҷҷатҳои довталабонро барои соли таҳсили 2021-2022 дар Академияи гумруки Россия эълон менамояд.

Дар асоси Созишномаи бисёрҷонибаи байниидоравии давлатҳои ИДМ дар бораи ҳамкорӣ дар самти тайёр намудан ва такмили ихтисоси кормандони гумрук аз 23 ноябри соли 1994, бо мақсади таъмин намудани мақомот бо кадрҳои баландихтисос ва пурра гардонии ҷойҳои корӣ бо мутахассисони варзида, аз ҳисоби шаҳрвандон - хатмкунандагони муассисаҳои таҳсилоти миёнаи умумии Ҷумҳурии Тоҷикистон барои таҳсил ба Академияи гумруки Россия фиристонида мешаванд.

 

Дар соли таҳсили 2021 - 2022 ба Академияи гумруки Россия (Москва ш.Любертси) ва филиалҳои он дар шаҳрҳои Санкт – Петербург, Ростови лаби Дон аз рӯйи ихтисосҳои «Фаъолияти гумрукӣ» (мутахассис), «Ҳуқуқшиносӣ» (бакалавр) ва «Иқтисодчӣ» (бакалавр) ҳуҷҷатҳои довталабон қабул карда мешаванд.

Барои дохил шудан ба Академияи гумруки Россия ҳуҷҷатҳои довталабон аз 3 то 20 майи соли 2021, ба муддати 14 рӯзи корӣ қабул карда мешавад.

Супоридани имтиҳонҳо аз ду марҳила иборат мебошад. Марҳилаи якум навиштани диктант бо забони рӯсӣ аз тарафи Хадамоти гумрук ва марҳилаи дуюми имтиҳонҳо аз фанҳои таърихи Россия, математика, забони рӯсӣ, забони англисӣ ва ҷомеашиносӣ (обществознание) аз ҷониби Академияи гумруки Россия қабул карда мешавад.

Ба диққати довталабон расонида мешавад, ки барои иштирок дар озмун, донистани фанҳои математика, забони рӯсӣ, забони англисӣ ва тайёрии хуби ҷисмонӣ, ҳатмӣ мебошад.

Оид ба шарту шароити таҳсил дар Академияи гумруки Россия ва филиалҳои он Шумо метавонед дар суроғаи rta.customs.ru маълумоти муфассал пайдо намоед.

Суроға: шаҳри Душанбе кӯчаи Бухоро-50/1, бинои Дастгоҳи марказии Хадамоти гумруки назди Ҳукумати Ҷумҳурии Тоҷикистон. Телефонҳо барои маълумоти иловагӣ: 223-12-16 ва 221-16-92 (иловагӣ 253).