ХАДАМОТИ ГУМРУКИ НАЗДИ ҲУКУМАТИ
ҶУМҲУРИИ ТОҶИКИСТОН

Пешгирии воридоти маҳсулоти хӯроквории пастсифат дар Суғд

Ҳангоми гузаронидани чорабиниҳои оперативӣ-ҷустуҷӯӣ аз тарафи кормандони Шуъбаи ташкили мубориза бар зидди ҳуқуқвайронкуниҳои гумрукии Раёсати минтақавии гумрукӣ дар вилояти Суғд дар маҳаллаи 15-уми шаҳри Хуҷанд ҳавлии истиқоматии шаҳрванд Ё. С., ки аз ҷониби ҶДММ «Адана» ба иҷора гирифта шудааст, мавриди азназаргузаронӣ қарор дода шуд.

Дар натиҷаи азаназаргузаронӣ аз дохили хона ба миқдори 660 килограмм хамираи шоколад ошкор гардид.

Моли мазкур ба шаҳрванди Ҷумҳурии Тоҷикистон Ю. Б., соли таваллудаш 1991, истиқоматкунандаи шаҳри Хуҷанд, маҳаллаи 19 тааллуқ дошта, номбурда ин миқдор молро аз деҳаи Борбордуқи ноҳияи Лайлаки Ҷумҳурии Қирғизистон бо маслиҳати пешакӣ бо «Нозим» ном шахс ба ҳудуди Ҷумҳурии Тоҷикистон пинҳонӣ бидуни назорати гумрукӣ бо истифода аз роҳҳои ғайрирасмӣ интиқол додааст.

 

  

 

Тибқи хулосаи филиали Суғдии Маркази ҷумҳуриявии экспертизаҳои судӣ ва криминалистии Вазорати адлияи Ҷумҳурии Тоҷикистон арзиши умумии моли зикршуда дар маҷмӯъ 302 ҳазору 130 сомониро ташкил медиҳад.

Ҳамзамон, тибқи хулосаи Сарраёсати Хадамоти назорати давлатии тандурустӣ ва ҳифзи иҷтимоии аҳолӣ дар вилояти Суғд маҳсулоти мазкур аз ҷиҳати микробиологӣ ҷавобгӯй набуда, ба ҳаёт ва саломатии инсон хатарнок мебошад ва ҳангоми истеъмол ба бемории шадиди меъдаю рӯда оварда мерасонад.

 

 

Нисбати ин ҳолат бо моддаҳои 209 қисми 1 ва 289 қисми 2 Кодекси ҷиноятии Ҷумҳурии Тоҷикистон парвандаи ҷиноятӣ оғоз карда шуда, аз рӯйи тобеияти тафтишотӣ ба прокуратураи вилояти Суғд фиристонида шуд.

 

Маркази матбуоти Хадамоти гумруки назди Ҳукумати Ҷумҳурии Тоҷикистон

Суроға: хиёбони Бухоро-50|
Ҷумҳурии Тоҷикистон|
ш. Душанбе|

(Cуроғаи почтаи электронии
Маҷаллаи "Гумрук")
info.gumruk@yandex.ru

Агар хоҳед, ки ҳамеша аз хабару эълонҳои нав огоҳ бошед, дар сомонаи мо обуна шавед: